الرئيسية / مقالات / إلي أن نلتقي قسم خالد في الطريق للنقطة (82) ..!

إلي أن نلتقي قسم خالد في الطريق للنقطة (82) ..!

في الطريق للنقطة (82) ..!

فعل السيد الهلال المهم وظفر بنقاط المباراة التي جمعته عصر امس امام الاهلي مدني لحساب الجولة (31) لمسابقة الدوري الممتاز .. وكما قلنا سابقا ان نقاط المباريات هي المهمة في هذه الفترة التي لم يتبق فيها غير ثلاثة اسابيع فقط للمشهد الختامي !

وصل السيد الهلال للنقطة (73) وحافظ على سجله خاليا من الخسارة .. وهو انجاز جديد يحسب (لسادة) الهلال الاشاوس اي نجوم الفرقة الزرقاء الذين تحملوا النقد وغضب الجماهير والترحال المستمر لكن عزيمتهم لم تفتر وهاهم يحققون انجازا جديدا يحسب لهم ولم يتبق لهم سوى ثلاثة مباريات امام مريخ الفاشر والخرطوم الوطني واخيرا مباراة المريخ التي حدد لها الخامس والعشرين من نوفمبر الجاري !

وصلنا الان بحمد منه وتوفيقه للنقطة (73) ولم يتبق لنا سوى (9) نقاط لنصل لمحطة النقطة (82)

اخيرا اخيرا ..!

احتشد هاتفي برسائل متعددة من الاخوة الأهلة وحملت تلك الرسائل الالم والحسرة لما آل اليه الحال بشقيقنا المريخ .. فقد اكتشف المجلس الحالي الذي لا يعلم احد من هو رئيسه بأمر المفوض الولائي ان لجنة مجلس المريخ وفي احدي دوراته قد قام ببيع كاس الذهب الذي ناله المريخ في المباراة التي جمعته بالسيد الهلال وهو ما اطلق عليه كاس (السد) .. واكتشف المجلس الحالي ان الكاس تم بيعه بمدينة القاهرة .. وقرأت ماهو اشبه بالتبرير من الاخ صديق على صالح عن الغرض من بيع هذا الكاس لتسيير امور الفريق المالية من معسكرات تحضيرية وتسجيلات وتذاكر طيران .. يا يا جماعه لو مجلس المريخ الحالي (المعارفين ليهو رئيس دا) لو ما عقد المؤتمر الصحفى لمناقشة الامور المالية والادارية ما كان في زول مريخابي بعرف هذه المعلموة الخطيرة .. اها هسي عرفنا كاس الذهب او كاس (السد) واتباع الباعهو شنو تاني والله جماهير المريخ ما عارفه الحاصل فيها ناديها شنو .. احتمال الجماعة ديل يكون باعو الاستاد .. اصلا حوض السباحة دا باعوهو زمااااان .. والمقصورة كتلت ليها زول .. كدي يا جماعة ورونا بعتو شنو تاني على الاقل عشان موضع النفخة الكذابة دي ما تقدونا بيها !

قبل فترة وتحديدا في العام 2003 كتبت مادة بالعزيزة صحيفة (الكابتن) تحت عنوان (هام لوزير مالية الهلال) وكان وقتها الاخ الحبيب احمد عبدالقادر امينا لخزينة نادينا … طالبت فيه احمد عبدالقادر بضرورة شراء فريق المريخ على خلفية الاموال التي تدفقت على خزينة الهلال لاعضاء الجمعية العمومية والتي بلغت وقتها اكثر من 7 مليار جنية وهو مبلغ في ذاك الوقت مهول .. فقامت الدنيا ولم تقعد لمجرد هذا الطلب الذي اعتبره اهل المريخ انتقاصا من المريخ النادي الكبير .. وبذات منطقهم ان كان المريخ فعلا كبيرا ويديره من يحبونه هل بالامكان ان يقوموا ببيع ممتلكاته التي تعد ارثا يجب ان تتم المحافظة عليه ..!

واذكر ان الاخ الامين البرير رئيس الهلال الاسبق فكر مجرد التفكير بصوت عال واعلن عن عزمه بيع كاسا الذهب الذان يمتلكهما الهلال فقامت الدنيا ولم تقعد حتى تراجع عن تلك الفكرة المجنونة لان الاقلام الزرقاء وقفت سدا منيعا واجهضت الفكرة قبل ان تكتمل تماما !

ولان مجلس المريخ الذي باع ارث ناديه كان يعلم جيدا انه سيجد معارضة كبيرة من قبل اهل المريخ قام (بأخفاء) الامر تماما عن الجماهير والاعلام حتى تم كشف الامر بالصدفة ولولا الازمة المالية الطاحنة التي جعلت من المجلس الحالي البحث عن اصول ناديه لظل الامر خفيا لا يعلم احد عنه شئيا !

الان المريخ بلا ارث يستند اليه بعد ان تم بيع ارثه .. وبلا مال يسير به امور الفنية والادارية .. وبلا رئيس يقود مجلسه !

وكشف المجلس من خلال مؤتمر (نبش المجلس السابق) كشف الحبيب محمد جعفر قريش نائب الرئيس عن فشلهم في التواصل مع (رئيس النادي مع وقف التنفيذ) حتى عن طريق الهاتف .. يعني (بلف ) الحبيب عبدالصمد الشهير مقفول الان بل لا يمكن الوصول اليه حاليا يعني الرئيس (مع وقف التفيذ) ممنوع عنه حتى المكالمات التلفونية وبالتالي فلا امل في الافق لحل ازمات المريخ الحالية .. اقول ليك حاجة يا محمد جعفر كدي شوف الاستاد لو ما باعوهو (ارهنهو) لاي واحد من ناس الهلال على الاقل عشان موضوع التسجيلات ..او (خللهو) على طريقة عادل امام ..!

اخيرا جدا ..!

سؤال برئ جدا هسي المدرب المسكين الجبتهو امس دا ح تدوهو مقدم العقد من وين يا حسرة ولا تاعبنو سااااكت تذاكر واقامة والمحصلة انتظار طويل من اجل فك اسر رئيس ناديكم !

طيب قولو ان المفوض بكره طلع قرارو وقبل الطعون المقدمة ضد سودكال ح تعملوا شنو ياربي .. وح تلقو ليكم رئيس وين وبراااكم قلتو في المؤتمر ان الديون (18 ) مليار .. هسي الرئيس البجيكم جديد دا يدفع للمدرب ولا التسجيلات ولا يحل ليكم الديون !

اقول ليك يا محمد جعفر كان اخير ليك الاتحاد والله مالك ومال المشاكل دي صرف في الفارغة ساااكت وفي النهاية برضو ح تكونو خلف السيد الهلال في روليت مسابقة الدوري الممتاز (وصيف يعني) !

اقول ليك اخر حاجة .. اذهبوا فانتم الطلقاء

التعليق بواسطة فيس بوك

6 تعليقات

  1. سالم الكبير

    قبل كده كتبت عن النقطة 88 وبعد مباراة واحدة فقط توالي نزف النقاط بثلاثة تعادلات متتالية وفقد الهلال 6 نقاط .
    اسي شغال تكتب عن النقطة 82 , دا معناهو الهلال ح يفقد مزيد من النقاط .
    انت زول كج وعارض
    اخدوها مني : الهلال سيتعادل في بقية المباريات الثلاثة .

  2. انت كجججججججججججججججججججججججج عليك الله نقطنا بى سكاااتك ياخى
    ما حصل اتكلمت عن فوز الهلال او نصر و لال انضربناااااااااااااااااااااااااااااا

    ياخى روووووق ياخى ابعد و اصمت يااااااااااااااااااااااااااااااااااااااخ

  3. هذا النوع من الكتابات لا يليق بكبار الصحفيين الاندية السودانية تعاني بسبب غياب اقتصاديات الرياضة والاعتماد على الاشخاص ان كانت ازمة المريخ ظهرت الان فالحال في الهلال يصير الى نفس المآل

  4. قنعت من 88؟!!!

  5. كان عندكم كاس صغيح في الزريبة خلي من دهب كان بعتوه من زمان وما خليتو هيثم يبيع عربيتو ويصرف على اللعيبه ويطلع بيان الجوع!!! وقبل كده الارباب طرح فكره بيع الزريبه وتحويلها صالحة غرب امدرمان وما بعيد هو الغشى الوالي وقال ليه بيع الكاس!!!

اضف رد

لن يتم نشر البريد الإلكتروني . الحقول المطلوبة مشار لها بـ *

*